Galing Sa Baul

All posts in the Galing Sa Baul category

Ang gunting ni Ate

Published June 24, 2017 by dapithapon

Minsan na akong naging biktima ng kuryosidad. Ang malala nito, napuruhan ang buhok ko. Buti na lang pala, sampung taong gulang palang ako noon. Kumbaga, wapakels pa ako sa kahihiyan. Hehe.

Isa sa mga sabjek ng Ate ko noong high school sa dating Holy Family High School sa Baguio City ay Personality Development at kabilang sa mga itinuturo ay ang paggugupit at pag-eestilo ng buhok. Dahil doon, nagpabili siya sa tatay ko ng isang set ng mga gunting at pangkulot ng buhok.

Palibhasa ay medyo makapal ang buhok ko kung kaya’t ako ang pinagpapraktisan ni Ate. Kadalasan ay kinukulot niya ang buhok ko o kaya gagawan niya ng iba’t ibang estilo.

Tuwang-tuwa ako habang pinapanood ko ang Ate ko na maingat na hinihila ang kinumpol na mga hibla ng buhok ko at ipinapaikot sa pink na rollers para kulutin. Pakiramdam ko ay minamasahe niya ang anit ko kung kaya’t tapos na niya akong lagyan ng rollers ay mahimbing na ang tulog ko.

Ito ang bonding namin ng kapatid kong panganay. Noong mga panahon kasing iyon, kami lang dalawa ang isinama ni Daddy na tumira sa Benguet at pinag-aral sa Baguio dahil hinihintay pa naming magtapos sa elementarya ang pangalawa kong Ate at ang Kuya ko na noo’y kasama naman ng nanay namin sa Laguna.

Lilinawin ko lang. Hindi hiwalay ang mga magulang ko. Nagkataon lang na nagtatrabaho bilang auditor sa Quezon City ang nanay ko at security manager naman sa isang minahan sa Benguet ang trabaho ng tatay ko. Upang mas makatipid sa pag-aaral namin ang mga magulang ko, kaming dalawa ng panganay kong kapatid ang kinuha ng Tatay ko mula sa Laguna para doon na sa Baguio magpatuloy ng pag-aaral. Nakapasa kasi ako sa iskolarsyip na binibigay noon sa anak ng mga kawani ng minahan.

Balik tayo sa hairstyling skills ng Ate ko. Pakiramdam ko noon, napakahusay ng Ate ko. Daig pa niya iyung gumugupit ng buhok ko sa parlor. Kaya pumapayag ako kapag inaayusan niya ako ng buhok.

Pero sa totoo lang, mas trip na trip kong pakialaman noon ay iyung panggupit ni Ate ng buhok. Sa talas ng gunting na iyon, tuwing ginagamit ni Ate, may maririnig kang mahinang tunog mula doon na parang kutsilyong hinahasa sa bato o kaya’y tila mga nagkikiskisang mga dahon.

Isang araw, naiwan ni Ate ang gunting niya. Maaga akong umuwi noon sa bahay namin kasi half day lang kami sa school. Habang nagsusuklay ako, nakita ko sa drawer ng tokador namin iyung gunting. Gumuhit ang ngiti sa mga labi ko.

Agad kong kinuha ang gunting ni Ate at tumingin ako sa salamin. Tinanggal ko ang headband ko at humulagpos ang aking bangs na lampas na sa tungki ng ilong ko ang haba.  Sinimulan ko itong gupitin. At siyempre, hindi pantay ang pagkakagupit ko. Katunayan, naging pa-dayagonal ang lapat ng bangs ko sa noo kung kaya’t ginupit ko ulit. Gupit dito, gupit doon ang ginawa ko hanggang sa halos sumagad na sa noo ko ang bangs kong sawi! Nagkaroon tuloy ako ng spike na bangs. Wehehehe!

Tapos sinunod ko namang gupitin ang buhok ko na hanggang balikat. Nilugay ko muna ito. Yumuko ako para mapunta sa harap ng mukha ko ang lahat ng buhok ko. Tapos pinaghugpong ko sa kamay ko, at saka ko ginupit. Noong hanggang leeg ko na lang ang buhok ko, tsaka ako tumigil. Ang resulta? Siyempre, hindi rin pantay-pantay!

Pag-uwi ni Ate mula sa eskuwelahan, nakita niya akong nakaupo sa sofa namin at nagbabasa ng libro. Agad niyang napansin ang buhok ko. Napa-oh-my-God ang Ate ko sabay pingot sa tenga ko.

Kinabukasan, pumunta kami ng Ate ko sa Burnham Park para mamasyal. Habang naglalakad kami, napapalingon sa akin ang mga tao.  May nakasalubong kaming magjowang Amerikano na huminto pa talaga sa harap namin at saka binati kami ni Ate.

Sabi ng Amerikanong lalaki sa girlfriend niya, “Look at that kid’s hair! It’s so trendy!”

Astig lang. May napapala rin pala paminsan-minsan ang kuryosidad ko at kakulitan.

Huwag kayong mag-alala, pagkalipas naman ng isang taon ay humaba na ulit ang buhok ko at simula noon, sa parlor na talaga ako nagpapagupit at hindi na kailanman nagsariling sikap. Hehe. (^__^)

 

Advertisements

Sabaw na Komiks

Published April 20, 2012 by dapithapon

Sinubukan ko dati na sumulat ng kuwentong pang-komiks. Iyung kuwento, pang-Liwayway Magazine ang daloy. Sabaw ang utak ko noong sinulat ko ito 7 years ago kaya kakaiba ang kinalabasan. Basta ang sigurado ko lang, hindi ito pang-Graphic Novel. Wala pa akong kakayahang gumawa ng gano’n. Pag-aaralan ko pa ng husto. Sampung sakong bigas pa siguro ang dapat kong kainin bago ako makagawa ng Graphic Novel a la Neil Gaiman, ang paborito kong awtor ng Sandman series. Sa ngayon, eto ang kinalabasan ng sinulat kong kuwentong pang-komiks. 😀

“Ang Pangarap ni Esteban Paraiso”  

Page 1

Frame 1- (I.G.)  Isang rumaragasang pampasaherong dyip na may lulang pasahero.  Malalim na ang gabi.  Inaantok ang drayber.  May makakasalubong na isang trak.  Yuyugyugin ng pasahero ang drayber.

Pasahero:  Mama! Gising! Baka mabangga tayo!

Frame 2- (I.G.) Naalimpungatan ang drayber pero huli na ang lahat. Bumunggo ang dyip sa trak.

 

Frame 3-(I.G.) Sa isang sementeryo nakatayo ang isang binata at isang matandang babae sa tapat ng dalawang puntod.

Caption: Pagkalipas ng isang taon ay dinalaw ni Esteban ang puntod ng magulang kasama ang kanyang Lola Trining.

Esteban: Pangako itay, inay, tutuparin ko ang pangarap niyo para sa akin.

Page 2

Frame 4- (I.G.) Isang lalaking may matipunong katawan, maamong mukha na binagayan ng matangos na ilong at malalam na matang may malalantik na pilik, alon-alon ang buhok at may morenong balat ay nakaupo habang nakasandal sa isang mataas na punong mangga.  Nangingilid ang luha sa kaliwang mata na nakatanaw ang lalaki sa lawak ng bukirin. May kasama siyang kalabaw. Nakatali ang kalabaw sa puno.

Caption:  Malungkot pinagmasdan ni Esteban ang lawak ng bukiring kanyang sinasaka.

Esteban: (Self Balloon) Kung buhay lang si inay at itay…

Frame 5- (I.G.) Same scene. Insert, isang matandang babaeng may bitbit na basket na may lamang pagkain. Nakapatong ang isang kamay ng matanda sa balikat ni Esteban. Lumingon si Esteban.

Lola Trining: Apo, kain muna. Tila malungkot ka na naman.

Esteban: Lola, gusto kong pumunta ng Maynila para mag-aral at yumaman.

Lola Trining: (Self balloon) Matupad sana pangarap mo apo.

Frame 6-(I.G.) Dapithapon sa bukid na may isang kubo.

 

Caption: Paglipas ng panahon, unti-unting nanghina ang katawan ni Lola Trining dahil na rin sa katandaan. Tuluyang naratay ito.

 

Frame 7-(I.G.) Nakahiga sa papag ang lola ni Esteban. Lumuluha habang hawak ni Esteban ang kamay ng matanda.

Lola: Tuparin mo ang iyong pangarap apo.

Esteban: Lola…huwag mo kong iwan. Huhuhu.

Frame 8-(I.G.) Burol ng lola ni Esteban sa kanilang kubo. Maraming tao. Itsurang nakikiramay. Si Esteban ay nakatingin sa kabaong ni Lola Trining.

Caption: Sa burol ni Lola Trining bumuo ng pasiya si Esteban.

Esteban: (Self Balloon) Lola, hahanapin ko ang kapalaran ko sa Maynila.

Page 3

Frame 9-(I.G.) Tanaw sa bintana ng kubo ang bukang-liwayway. Nakasilip sa bintana si Esteban. Me bitbit syang malaking bag.

Caption: Maaga pa lang ay nakagayak na patungong Maynila si Esteban.

Frame 10-(I.G.) Gabi na ng makarating sa Maynila si Esteban. Bumaba siya terminal ng bus. Sa di kalayuan, may anino ng dalawang lalaking nasa likod ng isang poste.

Anino: Tiba-tiba na naman tayo nito. Hehehe.

Frame 10-(I.G.) Lumapit ang dalawang anino kay Esteban at hinoldap ito.

Holdaper: (Shout) Holdap ‘to!

Frame 12-(I.G.) Bago tumakas binugbog ng dalawang lalaki si Esteban. May isang bading na palapit at nakita ang pangyayari. Tumili ito.

Godofredo: (Shout) Eeee! Pulis! Pulis!

Frame 13-(I.G.) Sa isang apartment nagkamalay si Esteban. Nakahiga siya sa isang sofa habang pinagmamasdan ng isang lalaking naka-make-up.

Esteban: Sino ka?

Godofredo: Ako si Godofredo. Godofredo by day, Goddess by night.

 

Page 4

Frame 14-(I.G.) Sa isang hapagkainan, sabay na kumakain si Godofredo at Esteban.

Caption: Tuluyang inampon ni Godofredo si Esteban. Hanggang isang araw…

Godofredo: Gusto mo bang kumita ng pera?

Esteban: Oo naman.

Godofredo: Ipapasok kitang macho dancer sa Gay Bar ko.

Frame 15-(I.G.) May isang stage kung saan may nagsasayaw na mga lalaking naka-trunks. Isa sa mga lalaki ay si Esteban. Nagpapalakpakan ang mga tao sa paligid. Me mga tumitili din.

Caption: Lumipas ang ilang buwan, isa ng ganap na macho dancer si Esteban.

Frame 16-(I.G.) Isang magandang babae, mga edad 45 ngunit maganda pa rin ang hubog ng katawan ang nakaupo sa isang sulok ng bar tanaw ang stage.

Caption: Tahimik na nakamasid ang isang babae sa mukha ni Esteban.

Bella: (Self Balloon) Napakagwapo niya…Gusto ko siya.

Frame 17-(I.G.) Kausap ni Bella si Godofredo. Nakangisi si Godofredo.

Bella: Ito ang P50,000.00 para sa isang buwang kaligayahan.

Godofredo: Mula ngayon sa’yo muna si Esteban.


Page 5

Frame 18-(I.G.) Silhoutte ng babae at lalaking nagtatalik.

Caption: Tatlong linggo ng nagsasama si Esteban at Bella.

Bella: Pinaligaya mo ako Esteban.

Esteban: Mahal na kita Bella. Aaaahhh…

Frame 19-(I.G.) Nagkikipag-usap si Bella kay Esteban habang nagsisigarilyo ito.

Bella: Mahal din kita pero dapat mong malaman, baog ako.

Esteban: Wala akong pakialam. Basta mahal kita.

Frame 20-(I.G.) Sa Gay Bar ni Godofredo, me inaabot na tseke sa kanya si Bella. Malutong na tumawa si Godofredo.

Caption: Nagpasya si Bella na tubusin si Esteban kay Godofredo.

Bella: Ito ang isang milyong piso kapalit ng paglaya ni Esteban.

Godofredo: Buweno, sa’yo na siya, Dahlin’! Hahahahaha!

Frame 21-(I.G.) Kinasal si Esteban at Bella sa simbahan. Madaming bisita.

Caption: At kinasal si Esteban at Bella.

Mga bisita: Mabuhay ang bagong kasal!

Page 6

Frame 22-(I.G.) Magkatabi sa kama si Bella at Esteban. Nakakumot sila habang nakasandal sa headboard ng kama.

Esteban: Nahihiya ako sa’yo babe. Ako ang lalaki dapat ako ang gumastos sa kasal natin.

Bella: Tsaka ka na bumawi love. Siyangapala, pag-aaralin kita. Huwag kang tatanggi.

Frame 23-(I.G.) Same scene, change angle.

Esteban: Sa isang kundisyon. Magtatrabaho ako sa kumpanya mo bilang messenger.

Bella: Hay…Ang love ko talaga…mapride. Sige na nga.

Frame 24-(I.G.) Graduation Day ni Esteban. Nakatoga ito. Yapos si Bella habang maluwang ang pagkakangiti.

Caption: Pagkalipas ng apat na taon…

Esteban: Sa wakas gradweyt na ako! Salamat babe.

Bella: Congrats love! Simula ngayon, ikaw na rin ang hahawak sa negosyo ko.

Esteban: Salamat, babe. Dahil sa tiwala mo natupad ang lahat ng mga pangarap ko. Mahal na mahal kita.

Wakas

%d bloggers like this: